Mesa maratona de chës 4 ores y mësa por le Consëi dl Comun de Badia, che é rové adöm en jöbia ai 7 de ma por süa pröma sentada do mëisc de palsa a gauja dl "coronavirus". La sentada án tigní tl gran salf dla Ciasa J. B. Runcher, por garantí les destanzes danter i aconsiadus y ince la jënt dal publich che gnô a d’ascuté sö. Dejesset ê i punc al ordin dl de, mo un di plü zîti án lascé rodunt ala fin: l’inserimënt tl plan urbanistich de n raiun por atrezatöres coletives sön Piz Sorega, dit en cört le léch artifizial "Codes", che la sozieté Grandi Funivie Alta Badia ó realisé por garantí ciamó de maius resserves d’ega por fá nëi. N léch cun la capazité de 78.160 m3 d’ega, ó dí passa 78 miliuns de litri.
Do che le punt ê bele gnü sburlé n iade l’ann passé, án traté la chestiun ince chësta jöbia. Damperfora él sté la inj. Margit Berger y spo l’inj. Johann Röck de Planteam che á ilustré les motivaziuns por la realisaziun de chisc léc y ince presenté chël che an tlama n "plan dla rota", tl caje che le léch ess por na rajun o por l’atra da se rumper o che l’ega jiss porsura. La discusciun dedó é stada valgamia lungia y ala fin án tut la dezijiun da fá na líta socrëta, n stromënt che ti é conzedü al Consëi y che vëgn adoré "canche ara nen vá de chestiuns zities", por zité les parores de n assessur. Y se mëte de travers ai proiec dles sozietés di lifc pó ester na chestiun zitia. Bëgn: do avëi cumpedé fora les zetoles, éson ma rová sön 6 usc por le proiet, tratan che 11 á dit de nou. Insciö é la chestiun gnüda sciurada zoruch.
T’La Usc di Ladins di 15 de ma podëise lí deplü sön i argomënc por y cuntra portá dant tla discusciun, sciöche ince sön d’atri punc interessanc tratá dal Comun de Badia. (pablo)