Badia: pröma mëssa cun le popul

Data

19 de mei 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
En lönesc sëra á i fedei de Badia indó podü jí a mëssa te dlijia, sambëgn cun les mosöres de precauziun scrites dant
Sciöche La Usc á bele scrit, pón cun i 18 de ma indó jí a mëssa te dlijia, ince sce al é cotan de limitaziuns: i posć é limitá, denanco jí te dlijia él da se dejinfeté les mans, an mëss avëi mascherot che cür nes y bocia, an mëss tigní les destanzes, les dlijies mëss gní dejinfetades. Te valgünes ploanies án bele metü man inier lönesc cun la pröma mëssa, sciöche p.ej. a La Val inier da doman, o ince a Badia, olache i fedei é rová adöm por la mëssa dales 19:30, zelebrada da siur Degan Iaco Willeit. Al ê la pröma mëssa dai 8 de merz incá. Dan üsc de Badia êl material da se dejinfeté, i posć te dlijia ê amarsciá vigni secunda proca.
Te dötes les dlijies dla Val Badia s’arjignon spo ala pröma mëssa che tomará chësc fin dl’edema, festa dl’Assënza o Ascensiun dl Signur.

I publicun chiló i orars y i posć
Corvara - 85 posć: sabeda 18:30, domënia dales 10:00 y 18:30
Calfosch - 35 posć: sabeda 17:00, domënia dales 8:30
La Ila - 55 posć: sabeda 8:00 y domënia dales 8:30
San Ciascian - 70 posć: domënia 9:00 (cun l’edema do ince sabeda 18:00)
Badia - 90 posć: sabeda 19:30 y domënia 10:00 y 18:00
Oies - 90 posć: sabeda y domënia 16:00
La Val - 120 posć: sabeda 19:30 y domënia 9:00
San Martin - 67 posć: sabeda 18:30 y domënia 9:30
Lungiarü - 56 posć: sabeda 20:00 y domënia 8:15
Antermëia - 45 posć: sabeda 18:00 y domënia 10:00
Rina - 50 posć (70 sce al é families): domënia 8:30
Al Plan - za. 80 posć: sabeda 18:00 y domënia 10:00
La Pli - sce al é bel tëmp, mëssa alaleria: domënia 8:30

"Sciöche i me confortâ canche ai dijô, i podun jí tla Ciasa dl Signur!"
"Le regolamënt é sambëgn scerio", dij siur Degan Iaco Willeit che inviëia da jí adorassá te dlijia y recorda ince che sce zacai ne pó nia ite, vëgnel taché ite i microfons alaleria. "Da jí ala Comuniun él ciamó plü zite, cis da tigní les distanzes da gní sö y da jí indó te proca; ince da jí fora de dlijia ól ester paziënza y se tó dlaurela. L’oferta pón dé jö ala fin dla Mëssa da jí fora de dlijia", recorda siur degan, che spliga ince che "al sará dan vigni dlijia porsones che fej le sorvisc dl ordin y mëss ciaré sura che döt sides en regola. Les dlijies é gnüdes y mëss tres indó gní dejinfetades. I adorun pa tröpes porsones a fá sorvisc. Al é döt n pü’ incomper, impó él bel ch’i podun jí a mëssa, sagns intun y ala Comuniun." Siur Degan stlüj jö cun les parores dl Salm "Sciöche i me confortâ, canch’ai dijô, i podun ji tla Ciasa dl Signur."  (pablo)