La Usc di Ladins

Ala fin de forá á la Uniun Ladins Val Badia tigní süa sentada generala, te chëra che al é ince gnü nominé danü le comité por i proscims trëi agn. Bele iló â le presidënt Michael Moling lascé alsavëi che al dê jö la inciaria, do ester sté a ce dla uniun por 6 agn – döes legislatöres. Da inier incá sán ince che che tolará ite so post. Te na sentada online tignida en mercui sëra, él gnü ofizialisé les inciaries. Le presidënt nü te chësta legislatöra é René Pescoll da La Ila, so vize é Samuel Clara da Lungiarü. Le presidënt da denant Michael Moling resta inant tl comité; ala pert él spo ince Alessia Sorá, Alexis Bassetto, Christian Ferdigg, Elena Frenademetz, Florian Tavella, Florian Barbolini, Silvia Costabiei y Timo Craffonara.

T’La Usc di Ladins di 5 de jügn podarëise lí na intervista cun le presidënt nü.  (pablo)