La staziun militara importanta de control internazional ti tëmps passá, de proprieté dl Demane sön Plan de Corones, passa dal Stat ala Provinzia. Incö, ai 4 de jügn, él gnü a s’l dé la firma a pe dl verbal dla surandada danter le presidënt dla Provinzia Arno Kompatscher y le diretur regional dl’Ajentöra dl Demane Sebastiano Caizza. Al’incuntada él sté ala pert ince la referënta iuridica dl’Ajentöra Eugenia Pantozzi Frezza y le vize-secreter general dla Provinzia Thomas Mathà, responsabl dl protocol dl’acordanza dl 2007 che prevëiga le passaje debann ala Provinzia de imobii demaniai che le Stat ne adora nia plü.
"Cun la firma da incö metunse a desposiziun dla coletivité n bëgn che podará gní anuzé dal’imprenditoria impiantistica y turistica tl dagní”, á dit Kompatscher. Le presidënt á sotrissé la buna colaboraziun danter Provinzia y Demane tl’atuaziun dl’acordanza. Le frabicat é sté le "Centro Nodale d’Area" dl militar sön na spersa de 350 metri cuadrac tl Comun de Mareo. Al é gnü fat sö tl 1990 y á n valur de 2,1 miliuns de euro – chësc scri l’Ajentöra por la stampa provinziala te n comunicat. (Iaco Rigo)
"Sciani" ala staziun dai soldas sön Plan de Corones
Ara passa ala Provinzia aladó de na acordanza firmada incö
Galaria retrac
- La staziun militara taliana chisc agn.
- Le diretur regional dl’Ajentöra dl Demane Sebastiano Caizza, le presidënt dla Provinzia Arno Kompatscer y le vize-secreter general dla Provinzia Thomas Mathà tratan la firma dl'acordanza. (Foto: ASP/Silvia Fabbi)
View the embedded image gallery online at:
https://www.lausc.it/valedes-ladines/val-badia/12809-sciani-ala-staziun-militara-soen-plan-de-corones#sigProId2fa8e38765
https://www.lausc.it/valedes-ladines/val-badia/12809-sciani-ala-staziun-militara-soen-plan-de-corones#sigProId2fa8e38765