La Usc di Ladins

Les edemes de "coronavirus" y de "lockdown" á ince lascé süa merscia pro la sconanza di tiers, olache an registrëia iniann na situaziun particolara. Un n fat é chël di tröc tiers che vëgn raitá sot, spliga Petra Alfreider, presidënta dl’Assoziaziun por la sconanza di tiers de Puster/Val Badia: "Tres le lockdown podô i tiers passé ia la strada sciöche ai orô. Sëgn che düc s’armöi indó é chësta por i tiers na gran tënora." N ater aspet é chël di tiers che vá ademal. Petra Alfreider: "Al momënt él indó sajun alta, le dolur di tiers á indó metü man y iniann él piec co zënza, deache nos volontares y volontars n’un nia podü daidé." Alfreider se referësc chiló en particolar al gran gröm de mins nasciüs, de chi che cotanc fej baldi na burta fin. Petra Alfreider spliga che i mins che roda incërch n’é nia ater che le resultat de iac de ciasa nia sterilisá, arbandoná o lasciá jí. "La soluziun foss tan scëmpla" – dij Alfreider – "Sterilisé!".
Tles ultimes edemes él sozedü valgügn caji desplajors y Petra Alfreider fej n apel da nia ciaré demez. Sce tiers patësc, desson daidé instësc, cherdé sö le dotur dai tiers o tó sö contat cun l’assoziaziun. Ara rengrazia bele danfora düc chi che dëida.

Deplü ciafëise t’La Usc di Ladins di 12 de jügn  (pablo)