La Usc di Ladins

Al ê sté n pü’ de spordüda, ai 23 de jügn, canche al ê gnü comuniché che al foss gnü fat laurs sön Ciaulunch y che la strada foss stada sarada por n mëis. Alarm falz, n fal de comunicaziun.
I laurs vëgn fac, mo la strada resta daverta. Chësc vëgn lascé alsavëi tres n comunicat dla Provinzia de Balsan. Sön n toch de strada che porta al Ju de Ciaulunch, sön terac dl Comun de Corvara, vál debojëgn da fá laurs de prescia, por comedé danns gaujá dal rî tëmp. I laurs mët man en lönesc ai 6 de messé, sön n toch de indöt 700 metri, y tratan i laurs podarán transié sön öna na striara.
I laurs vëgn finanziá tres n fond dla Uniun Europeica. Ai dess gní stlüc jö tantosc, a na moda che an pois indó garantí na zircolaziun sigüda sön döt le ju, sides por la jënt dl post, che por i ghesć. Laurs che vá ince a bëgn di eserzizi sö por le Ju, y che pormetará dedó ince indó da desfiré manifestaziuns dla roda.  (pablo)