La Usc di Ladins

Chi che ê ala pert se la recorda sigü ciamó, la serada di 2 d’agost 2016 a La Val. Al ê chë serada publica olache la popolaziun gnô informada sön la orenté da aciasé 25 muciadus tla ciasa "Morin". Na serada da me de vënter, da dí ma bel, odon les gran emozionalités y animosités gnüdes fora tl salf "Dumëne Moling". Ti mëisc dedó s’á le Comun da La Val dé da fá por arjunje la poscibilité da podëi partí sö i migranc te de mëndri grups sön plü comuns, ci che foss sté plü saurí da gestí y ince da i trasmëte ala jënt. Al é mirit dl Comun da La Val sce an á ince te Südtirol tut en conscidraziun tres deplü le proiet statal SPRAR, che preodô avisa chësta soluziun.
Te nosta provinzia él sté scialdi les comunités comprensoriales che á acompagné i comuns tl proiet SPRAR: á daidé desfiré ia la burocrazia, á tut sö personal aposta por acompagné i muciadus, y á – dit en cört – fat n laur ejemplar. Tl raiun dla Comunité Comprensoriala de Puster él sté sis comuns che á metü a desposiziun strotöres, por n total de 31 post. Pro chisc êl ince i comuns da La Val y de Mareo. A La Val él rové alerch 5 migranc te n cuatier de calonia, te Mareo n’él rové 6 tla "Ciasa Sanví" a Longega. Tröc migranc che á ciafé alberch chiló á ince ciafé n laur, valgügn s’á cinamai integré tla comunité, tolon pert ales ativités.
Sëgn él indere gnü la duscia frëida, deache cun la fin dl ann jará le proiet SPRAR a piz y ne gnará nia plü porté inant. Na dezijiun che á ince descedé perplessités.

T’La Usc di Ladins di 14 d’agost podëise lí deplü  (pablo)