La Usc di Ladins

Do che la Ciasa dal Mone tl zënter d’La Pli ê gnüda trata jö – por rajuns de segurté publica – ai 4 de dezëmber 2000, ciarâ fora le paisc ciaran da Curt y Plazores ca desco na bocia zënza n dënt amez. Chësta parüda slociada á sëgn naota na fin, almanco esteticamënter ciara fora le paisc miú.
I laurs por realisé la ciasa nöia vá inant y ciamó dan l’invern podess la ciasa ti gní surandada ales döes uniuns de paisc, por che chëstes aredëies spo aladó dla funziiun y dl debojëgn sü local.
Le proiet preliminar por fá la ciasa danü ê gnü lauré fora dai architëc Plankensteiner & Steger da Bornech, de forá dan dui agn (dl 2018) ti êl gnü presenté ales uniuns dla Musiga y di Jogn. Danfora ti â le Comun de Mareo cumpré jö ala Ploania d’La Pli la spersa di 576 mq de terac y la cubatöra, por na soma de 80.000,00 euro.
Le proiet esecutif ê gnü aproé dala Junta de Comun ai 17 d'otober 2018; chësc ê gnü lauré fora dal stüde hbpm y amunta a na soma de endöt 648.882,07 euro, de chësta 631.184,91 euro por laurs söla basa dai laurs scric fora y 17.697,16 euro de cosć por la segurëza.  (Iaco Rigo)