Al ê gran aspetanza tl Comun de Badia por odëi sciöche l’Ombolt Iaco Frenademetz ess fat da mëte adöm la Junta por i proscims 5 agn. Chësc án ince odü dala tröpa jënt rovada en mertesc da doman tla Ciasa Runcher a d’ascuté sö. Frenademetz y süa "Lista Badia – La Ila – San Ciascian" á pro les lítes ma arjunt cater mandac y le 24,9% dles usc, tratan che la lista de so concorënt diret "Manfred Canins Ombolt" é rovada sön 7 mandac y le 37,2% dles usc. Inant án te Consëi la lista "Deburiada" cun 5 mandac y le 28,5% dles usc y ciamó la "Lista Zivica por düc" cun 2 mandac y le 9,4% dles usc.
Ala fin n’á la pröma sentada doré gnanca n’ora. Iaco Frenademetz á proponü sciöche assessurs Edith Dapoz Valentini de süa lista, Werner Pescosta, Thomas Pescollderungg y Elide Mussner Pizzinini dla lista "Deburiada" y ciamó le candidat a ombolt Christian Pedevilla dla Zivica. Cun chësta proposta á Frenademetz ciafé la crëta de 11 aconsiadus sön 18, tratan che decuntra á lité i 7 aconsiadus dla lista "Manfred Canins". Chësta é insciö restada "defora da üsc" y sará ti proscims 5 agn al’oposiziun. Les reaziuns ala proposta é ince stades aladó, cun na discusciun via, mo corëta.
Na sintesa de ci che al é gnü dit, podëise lí do t’La Usc di Ladins di 9 de otober. (pablo)
Badia á la Junta, la lista "Canins" resta defora
L’Ombolt de Badia Iaco Frenademetz ciafa bele al pröm bot la crëta por süa proposta de Junta, tres na coaliziun cun la lista "Deburiada" y la "Zivica Por Düc". Degun post por i aconsiadus dla lista "Manfred Canins"
Galaria retrac
View the embedded image gallery online at:
https://www.lausc.it/valedes-ladines/val-badia/13676-badia-a-la-junta-mo-la-lista-canins-resta-defora#sigProId3a55ef4416
https://www.lausc.it/valedes-ladines/val-badia/13676-badia-a-la-junta-mo-la-lista-canins-resta-defora#sigProId3a55ef4416