La Usc di Ladins

Les lîtes de Comun á porté te Mareo n gran scassarot. Impröma a ce dl Comun, olache Felix Ploner da La Pli á arjunt le scagn da ombolt cun 18 usc deplü co l’ombolt da denant Albert Palfrader. Y spo él ince sté n scassarot te Consëi, olache al é bëgn 10 aconsiadus nüs respet ala ultima legislatöra. Chësc vëndres dales 17:00 é le Consëi nü rové adöm te palestra d’Al Plan por süa pröma sentada, olache al s’á ince abiné n gran publich a d’ascuté sö. La sentada é por le pröm iade ince gnüda trasmetüda en direta Facebook.
Sciöche pröm punt al ordin dl de êl la sostituziun dl ex ombolt Albert Palfrader, che á dé les dimisciuns dal Consëi. Al é insciö gnü tut ite l’aconsiadú nü Klaus Mutschlechner. Dedó éson passá al’ejaminaziun y aprovaziun dla litabilité de ombolt y aconsiadus, y spo él sté Ploner che á dé jö le joramënt.

La Junta nöia
Le punt plü aspeté ê zënzater chël dla proposta de Junta. Ploner á tut ite de süa lista (Paisc d’La Pli) l’assessur Ludwig Rindler, dla lista da Rina l’assessur Pepi Tasser y dla lista d’Al Plan i assessurs Paul Pisching y Elisabeth Frenner Suani. Chësta ultima é la sora assessuria che ê ince tla legislatöra da denant.
Pro la discusciun sön la proposta ne n’á nia mancé les delujiuns y les animosités. La maiú dejaprovaziun por la proposta de Ploner é gnüda rodunt da un di sü, l’aconsiadú Patrick Complojer, che é sté assessur da La Pli i ultims dui agn y mez y che â ince ciafé le plü usc sön la lista da La Pli. Contrarieté é ince gnüda da pert di aconsiadus dla lista surafrazionala "Düc Adöm", che á arjunt n chert dles usc te Mareo cun cater mandac, y s’ess porchël aspeté ince n post te Junta. Tres l’aconsiadú Wilhelm Hochwieser á "Düc Adöm" fat la proposta da dé jö la usc cun litaziun socrëta, ci che an á spo ince fat. Le resultat é tomé fora cun 10 usc a öna y 5 decuntra.

Deplü sön la discusciun te Consëi podarëise lí t’La Usc di Ladins di 16 d’otober.

© Foto: Pablo Palfrader/La Usc di Ladins  (pablo)