La Usc di Ladins

I Carabiniers da Bornech, en colaboraziun cun i colegs de Badia y le suport dla unité cun i cians da Leifers, á aresté a Badia döes porsones che â pro d’eres sostanzes proibides da vëne inant.
Döt cant é sozedü le mercui domisdé y á metü man canche i Carabiniers á tigní sö n auto cun laite döes porsones. Le sospet é nasciü dal comportamënt nervus dla ëra, che ê por ater bele denant stada liada ite te fac de sostanzes proibides, sciöche les forzes dl ordin á podü azerté. I Carabiniers á insciö fat na percuisiziun dl auto, olache ai á ciafé 200 gram de marijuana y 5 gram de cocaina. La percuisiziun é jüda inant te ciases, olache al é ciamó n iade gnü a löm 500 gram de marijuana y 40 de cocaina, cun lapró stadires de prezijiun y passa 2.000,00€ en contanc. Le sospet é che ai vëgnes dala venüda.
Cun chësta cuantité de sostanzes, ti á i Carabiniers scrit dant ales döes porsones l’arest a ciasa, olache ares é a desposiziun dl’Autorité Iudiziara da Balsan. Döta la droga é gnüda secuestrada y menada inant al Laboratore spezialisé di Carabiniers a Leifers, por analises plü menüdes.  (pablo)