La Usc di Ladins

60 é n bel numer por na ediziun periodica y progressiva, ciamó lapró sce ara é gnüda fora costantemënter. Basta ti ciaré a döta la coleziun di calëndri ladins, metüs sö dal 1962 incá, por odëi tan bela che ara é por l’edl y tan rica che ara é de retrac, scric, documentaziun storica y popolara. La storia dl Calënder Ladin ê piada ia püch do le 1960, do che l’uniun culturala y artistica EPL â ciafé n statut y â metü man da fá ativité ofiziala. Danter i pioniers culturai de chi agn y iniziadus dla uniun EPL êl siur Angel Morlang, prou, scritur y depenjadú artist. De süa compagnia de chi agn él ma plü en vita Franz Vittur, pröm intendënt dles scores ladines de Südtirol y un di auturs plü lezitënc y plurivalënc por libri de cunties, leteratöres, artisć y ince por la scora ladina che â da chirí chi agn na süa identité y na süa autonomia tla smorzia dles döes cultures stersces todëscia y taliana.

"Calënder Ladin 2021"

Ara ti á toché ala ceramista artistica Irina Tavella da mëte a desposiziun sües operes al fotograf Hermann Maria Gasser por le cuertl, i mëisc y ince na presentaziun biografica cörta. Lapró tol ite chësc calënder indó cunties, tröc retrac vedli, biografies de porsones sciöche Willy Costamoling, Siur Hans da Cianëi, Konrad Suani, Giuvani Pescollderungg y Gustl Frenademez. Danterite él de bi retrac de flus de munt coiüdes cun l’aparat da fá jö da Andrè Terza. Ince n articul ampl söl mudamënt dla pauraria de Lois Trebo á le Calënder da pité. Deplü é ince i tratac: un sön la storia di Rec y Ladins, y l’ater söla tradiziun da turné la pëgna por fá smalz te ciasa. Lapró él ajunté les firmes y i profescionisć che sostëgn finanziariamënter le laur dl’ert y dla cultura ladina dl’EPL–Ert por i Ladins, la uniun che dá fora le Calënder dal 1961 incá.

Liéde do deplü te La Usc di Ladins gnüda fora en vëndres ai 20-11-2020!

Foto:
Le "Calënder Ladin 2021" pó gní cumpré – al momënt – tla botëga Market da Richard a Longega y sön prenotaziun telefonica dala Mascotte a Al Plan de Mareo. Canche la situaziun dles restriziuns cuntra le Covid–19 le conzedará, jará indó crameres y crameri da ciasa a ciasa a le vëne.