La Usc di Ladins

La direziun dles scores altes da La Ila á tut sö cun interes l’invit dles assoziaziuns sportives locales (Sci Club Ladinia, Ice Club, Alta Badia Nordic y Hockey Club) da definí na colaboraziun ofiziala, strotorada tl tëmp, danter scora y assoziaziuns sportives. Na novité y na conzesciun implü da pert dla scora, deliberada dal consëi di dozënc, sará chëra da ti dé la poscibilité ai studënc-atlec, tratan la sajun da d'invern, da podëi s’alené ince dui dis al’edema danmisdé, da doman dales 8.00 cina les 10.00. Sambëgn ti gnarál a chësta moda pité spo ai studënc cursc y ofertes formatives domisdé y tratan l’ann de scora, por fá a na moda che le stüde dles materies scolastiches ciafes le tëmp che al s’adora. Le fin de chësta colaboraziun é chël da promöie n bun ecuiliber danter la scora y les ativités sportives, ti don insciö la poscibilité ai atlec jogn dl post da podëi romagne tla bela Val Badia y frecuenté cun profit un di trëi rams dles scores altes da La Ila: l’Istitut Tecnich Economich, le Lizeum Linguistich y le Lizeum dles Sciënzes Umanes. 

Deplü podëise lí sön la "Plata dles scores altes" tla ediziun di 23 de dezëmber de nosc foliet.   (Carlo Suani y Christian Ferdigg)