La Usc di Ladins

L'educaziun ala sanité y la sensibilisaziun ala sconanza de nosc ambiënt é dui argomënc che les Scores Altes da La Ila se tol dër a cör. Vigni ann él gnü traté tematiches desvalies. 
Por chësc ann de scora él gnü organisé le proiet »Renforzé les competënzes vitales« por la pröma y les secundes classes, n curs sura maraties sciöche depresciun, tëmes y burnout por les terzes classes, n referat dal titul »Sanité tl monn« por la cuarta classa, n curs de yoga por la cuarta y les cuintes classes y danter l'ater ince cursc de pröm aiüt por deplü classes. Al vëgn insciö ciaré che les scolares y i scolars pois se dé jö vigni ann cun val'aspet dla sanité o dl'educaziun ambientala por formé jones y jogn stersc por so dagní y sensibli a ci che é incër ai ia.

 (kp)