La Usc di Ladins

La didatica a destanza á porté i insegnanc y les insegnantes a se dé jö cun les tröpes formes de plataformes, tools y apps che alisirëia n insegnamënt digital online a destanza. An alda baian tröp di prighi che l’internet porta, mo sce al vëgn adoré indortöra y finalisé, pól alisiré dassën l’aprendimënt, y ince l’individualisaziun dl insegnamënt por i scolars y les scolares. Pro tröc tools online se trátera de massaries lëdies, chël ó dí che an n'á nia debojëgn da se registré, al basta ti jí do a n link. An pó i definí aiüc por n insegnamënt, che motivëia i scolars y les scolares, che pormët colaboraziun y interativité, ince a destanza. Telegra.ph é por ejëmpl n te' tool, che favorësc le lauré colaboratif, atif y interatif da pert di studënc. Chësta plata ti dá ai scolars y ales scolares la poscibilité da publiché sü tesć te na manira anonima y zënza se registré. L'insegnanta â dé sö le laur da ester blogher por n de. I scolars y les scolares á imparé ci che al é n blog y ci carateristiches che na te' sort de test dess avëi. Implü él ince gnü damané da se fá n avatar y le ciarié söle blog. Chiló á imparé i scolars y les scolares competënzes digitales che an adora tresfora tla vita da vigni de y tl monn dl laur d'aldedaincö. Chiló de sot él n valgügn ejëmpli de laurs fac dai scolars y dales scolares, che é stá blogheri por n de: https://telegra.ph/Finalm%C3%ABnter-fora-de-ciasa-12-14 https://telegra.ph/Les-stries-dla-n%C3%B6t-12-13 https://telegra.ph/La-didatica-a-destanza-na-manira-n%C3%B6ia-por-f%C3%A1-scora-12-14  (Magdalena Miribung)