"Aiüt sot na buna stëra" é le motto dl’aziun di Trëi Rêsc che vëgn organisada ann por ann tres la Schira Jonila de Südtirol. Atramënter sarára en chësc iade, olache l’aiüt ne pé nia propi tan sot na buna stëra. Le "corona" mët ince pro chësta aziun cotan sotissura, cun na linia de limitaziuns che la fej valgamia ria da jí a incundé la Buna Noela de Nadé. Chësc se lasciará sintí sön l’aziun instëssa, che é dantadöt na bela tradiziun y ocajiun por rové tles ciases, jí a ciafé families y cis ince les porsones sores. Ara se lasciará spo ince sintí sön les spënores che la jënt fajô y insciö ala fin sön i plü debli: chi che tirâ gran benefize dai tröc proiec de solidarieté.
Tl ann 2020 él sté passa
5.000 mitans y mituns che é jüs a fá i Trëi Rêsc te nosta diozeja. Jon da ciasa a ciasa él gnü ite la bela soma de 1.538.384,45€, de chisc daimpró da 74 mile ma tles 12 ploanies dla Val Badia. Cun chësta gran spënora él gnü finanzié o sostigní bëgn 121 proiec de solidarieté. Chësc ón sambëgn ince fá cun l’aziun da iniann. Scebëgn che la aziun é cotan atramënter, n’é le bojëgn tles teres plü püres nia demanco. Porchël vëgnel impó invié y sensibilisé la jënt da sostigní i proiec cun la spënora che ara arata. Al sará la poscibilité da les fá pro les mësses dle Santaguania (vigni ploania informëia sön sües plates dla cöra), an pó fá spënores online sön
http://twn.gl/sternsingen y l’atra poscibilité é da fá na spënora tres banca, sön le cunt »Bischöfliches Ordinariat«, IBAN IT56T 03493 11600 000300202908, cun la causala »Sternsingen 2021«. A düc n gran dilan bele danfora, tla speranza che chësta sides na ezeziun, y che i Rêsc vëgnes bele l’ann do indô te nostes ciases.
I sun jüs a damané do co che an fej te valgünes ploanies dla Val Badia. Deplü ciafëise t’La Usc di Ladins di 23 de dezëmber (pablo)
