Le lëgn da Nadé ladin a Roma

Data

27 de dezember 2020

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
Dl 2007 â la Val Badia fat la donaziun dl lëgn da Nadé por la Plaza San Pire tl Vatican
Tröc se recordará ciamó da ester jüs dan 13 agn a Roma por la surandada y benedisciun dl lëgn da Nadé por le Papa. Dai cin’ comuns dla Val Badia él jü n gran cor moscedé y na musiga, i ombolc y les autorités politiches dla Provinzia.

La Usc di Ladins scriô laota
Le Papa i à conzedü le vëndres ai 14 de dezëmber 2007 na udiënza privata ala delegaziun de 230 porsones dla Val Badia. Papa Joseph Ratzinger à saludé a usc te chësta ocajiun dötes y düć por ladin. Al à odü le gran lëgn gnü dala Val Badia desco n "simbol significatif dl Nadè de Crist, deache cun sües fëies dagnora vërdes recôrdel la vita che ne mör nia, le peció é tambëgn inće simbol dla religiosité popolara de osta valada che se manifestëia a na moda particolara tles prozesciuns". Al à inće enjuntè che "le lëgn y la crìpela é elemënć de chë atmosfera tipicia dal Nadè che alda pro le patrimone spiritual de nostes comunitês; ara se trata de na atmosfera chîta de religiosité y de intimité familiara, che i messun conservé inće te nostes sozietês d’al dédaincö, olache al pê che la gara al consumism y l’archirida ma de bëgn materiai suravèles. Nadè é festa cristiana y sü simboi - danter chisc dantadöt la crìpela y le lëgn fornì sö de scincundes - respresentëia referimënć importanć al gran mister dla Incarnaziun y dla Nasciüda de Gejù". Le Papa à inće spo stlüt jö so discurs tla Sala Clementina cun n salüt y na aodanza de n "Bun Nadè" por ladin.  (Iaco Rigo)