La Usc di Ladins

Al ê l’ann 2003 che André Comploi d’Al Plan metô sö a Viena le cor "cantus iuvenis" (Cianté jonn). Al é n cor metü adöm da studënc y academics jogn da Austria, Germania y Südtirol, che s’á ince lascé aldí plü gonot tla Val Badia. Comploi á albü la direziun da impröma incá, cina l’ann passé ai 14 de dezëmber, canche al á mené la bachëta por l’ultim iade. Püc mëisc dedô se trasferîl a Milan tl "Teatro alla Scala", porchël ál dé jö la inciaria. Le cor s’á metü ala chirida de n dirighënt y diretur artistich nü, che an á pordü presenté iniann d’otober. Al é indô n ladin. Mathias Crazzolara da La Ila. "Jonn, competënt y dër motivé", scrí le cor sön süa plata Facebook. Mathias é nasciü dl 1998 y stüdia Pedagogia strumentala y dl cianté tla Universität für Musik und darstellende Kunst a Viena. Dal 2019 incá se dedichëiel ince al stüde de "Educaziun musicala" cun orientamënt prinzipal sön la Direziun de cors. Sü azënc é sön la formaziun dla usc de mituns y jogn, sciöche ince direziun de ensëmbli. A Mathias döt le bun por la inciaria, y i sperun che i podunse tosc l’odëi y l’aldí cun le cor te nostes valades.  (pablo)