La Usc di Ladins

En chësc ann tan particolar, olache la sajun da d'invern n'é nia ciamó piada ia, mo olache la contrada é curida da nëi bel assá, á l'Assoziaziun Turistica Alta Badia ponsé da organisé n concurs interessant. Ara se trata de na gara a chi che fej le mandl de nëi plü original, che recordes te val' maniera l'Alta Badia. L'iniziativa á inom #altabadiasnowmanchallenge y düc chi che á vëia da soghé cun la fantasia pó tó pert. Al é anfat olache an fej sö le mandl de nëi: t'urt, te bosch, sön munt o te cité. L'important é che al recordes te val' maniera l'Alta Badia. La foto dl mandl messará gní menada ite danter i 31 de jená dl 2021 ala misciun e-mail laval@altabadia.org, scrion l'inom y da olache an é. Les fotografies gnará publicades sön Facebook; chëra che ciafará plü »likes« davagnará y le mandl gnará incoroné »Re dla Nëi« dl'Alta Badia  (kp)