La Usc di Ladins

L’ann 2020 jará sambëgn tla storia sciöche l’ann dl coronavirus, che á tan condizioné ciamps desvalis de nosta vita: da chëra sanitara a chëra soziala, da chëra economica a chëra dla formaziun. Sambëgn é le corona ince pert de nosta retrospetiva sön l’ann passé, che i ciafëis t’La Usc di Ladins di 8 de jená.
Mo le 2020 é sté cotan deplü co le virus: al é sté ann de lîtes comunales y dl referendum por le smendrimënt dl parlamënt, che á porté movimënt tla vita politica locala; al é sté l’ann dles prömes mësses en streaming y finalmënter ince indô de na mëssa noela. Le 2020 é sté l’ann cun cotan de corëtes dl tëmp, danter roes, rogossies y noveres, y al é baldi ince sté n ann cun plü desgrazies mortales sön strada y tla natöra, y valgügn mesdefüch y inzidënc. Scemia che la vita culturala é stada scialdi chita, él impó ince sté l’ann che i artisć ladins á tigní na gran mostra tl MMM Ripa pro le ciastel a Bornech. Lapró él gnü fora le liber de paisc a La Val y la CD "Forza" de Anita Obwegs. Nia inultima él ince garaté de bi resultac sportifs.

Inscioma, te chësc 2020 él impó sozedü cotan y de vigni sort. T’La Usc di Ladins di 8 de jená ciafëise plü plates cun valgügn di avenimënc interessanc y importanc che á caraterisé nosta vita tla Val Badia. Buna letöra  (pablo)