Mareo: jonn sot na lovina y dassënn fortuné

Data

23 de jené 2021

Galaria retrac

Grandeza scritura

riduci dimensione font aumenta la dimensione del font

Social

FacebookTwitterGoogle Bookmarks
En sabeda domisdé é n jonn dl post rové sot na lovina da Plan de Corones jö. Por fortüna ne s’ál fat nia. "Na bela gran fortüna" dij le surastant dl Aiüt Alpin Mareo
Chësta sabeda domisdé él sozedü sot Plan de Corones n inzidënt che ess podü deventé desgrazia, mo é por fortüna jü döt cant a bun fin. Cin jogn dl post ê jüs sön Plan de Corones y gnô dala pert marora jö devers Costamesana. A n’altëza de incër 2.000 metri, sot la ütia Graziani jö, éra sozedüda. Al s’á destaché na lovina, alimentada dala nëi tomada tla nöt denant, che s’á tut para un di cin’ jogn y l’á sopolí daldöt. Atira él gnü alarmé i stödafüch da Al Plan y La Pli, sciöche ince les scuadres dl Aiüt Alpin y Socurs de munt incër Plan de Corones. "Le jonn n’â degun pips pro d’ël y ê sopolí n meter sot la nëi", dij Harald Frenner, surastant dl Aiüt Alpin Mareo. Al é sté sü compagns che é stá bugn da le ciafé scialdi defata y le trá fora, zënza degünes ferides. Canche le joler Pelikan é rové te Mareo por joré sö i socoridus dl Aiüt Alpin, êl bele gnü la comunicaziun che an l’â trat fora, cunta inant Frenner, che baia de na "bela gran fortüna" por le jonn, "che ai l’á atira ciafé". Le jonn n’â degünes ferides y á orü s’un jí a ciasa cui schi. Na storia cun "happy end" en chësc iade, ci che fej zënzater bun, do chëstes edemes olache an á rodunt tla Ladinia albü tröp da pluré de chësc vers.

L’Apel dl Aiüt Alpin Mareo: Controlé i boletins dles lovines y avëi para la dërta atrezadöra
Te n post sön Facebook fej l’Aiüt Alpin Mareo n apel a düc, cun chëstes parores: "Deache incö unse albü n intervënt por na lovina cun n schiadú sopolí sot ite, oresson sensibilisé da controlé le boletin dles lovines, respeté sce les sëmenes y trus é stlüc y dantadöt adoré dagnora n ARVA en combinaziun cun badí y sonda. Chëstes é dötes cosses por stravardé osta vita! Incö é por fortüna jü döt a bun fin, mo i oresson poscibilmënter evité de te’ intervënc le plü che ara vá." 
 (pablo)