La Usc di Ladins

»Co sunse pa pordërt parenté cun Sant Ujöp da Oies?« Chësta é na domanda che ti é gnüda fata gonot a Daria Valentin y é ince öna dles motivaziuns che l'á portada a mëte adöm n liber di antenac, le liber de süa familia. Al é na publicaziun che ara á orü ti dediché a sü mituns Noel y Amelie, por ti lascé valch de particolar y por ti pormëte da conësce sües raisc.  Tla publicaziun i vá do l'auturia a cin' generaziuns, che á porté pro che le liber garatass scialdi gran y gros. Feter 400 porsones é gnüdes descrites te 700 plates y trëi lingac: ladin, talian y todësch. Le cost de stampa é porchël scialdi alt y insciö él al momënt ma gnü dé fora 25 copies, a chi che se l'á damané y dejidré. Tla publicaziun ne ciafon nia ma la storia de na familia, la familia Frenademetz da Peslalz, ince conesciüda sciöche familia dl Ström, mo de döt le paisc y dla valada, cun tröpes informaziuns sön inoms, cognoms y toponims, dla Val Badia y por tan che ara é jüda, ince da foradecá. Le liber vëgn arichí da n gröm de fotografies »por podëi confronté i mëmbri dla familia y odëi fora somianzes«, nes spliga l'auturia. Le liber é gnü presenté a Oies ai 3 de dezëmber y por l'ocajiun él ince gnü zelebré, da pert de siur Pio Dapré, na santa mëssa de comemoraziun di antenac.

Deplü sön le liber nes unse lascé cunté dala auturia, Daria Valentin, te na intervista che i podëis lí tla ediziun stampada dl vëndres ai 23 de dezëmber.   (kp)