La Usc di Ladins

Ai 8 de novëmber s’á tl salf dl Istitut Ladin Micurá de Rü desfiré na sëra d’informaziun cun mësa torona sura la tematica dl »Amur da tosser«. Le publich é gnü acompagné fora por la serada dal duo de moderaziun de Jasmin Ferdigg y Simon Kostner, che á podü rovëne la discusciun danter i ghesć rová adalerch te chësta ocajiun. Ala pert é stades trëi figöres profescionistes, che se dá jö vigni de te so laur cun la violënza cuntra les ëres y la conësc porchël dër bun: Ingrid Palfrader, responsabla dl Sorvisc Ciasa dles ëres por la comunité comprensoriala Val de Puster; la dra. Giuliana Franchini, psicologa y psicoterapista, ince ativa tl ciamp dla violënza sön i mituns, y Michael Benetti dla Consulënza por ëi Caritas dla Diozeja da Porsenú.

La violënza se presentëia te tröpes formes, n valgönes é plü da odëi y d’atres demanco. Impó pó chësta gní reconesciüda dal’ëra tl mëteman, denanche ara sides da odëi ince da defora y arjunjes situa­ziuns gravoses: »Te tröc caji scomëncia döt cant cun la violënza psicologica. Chësta é la forma plü generala, mo ince chëra plü ria da reconësce, sides por les ëres che é tla relaziun co por la jënt da defora.«, dij la dra. Giuliana Franchini, che laora cun ëres che á subí violënza.

Deplü ciafëise da lí tla ediziun nöia de vëndres, ai 22 de novëmber!