La Usc di Ladins

Na bela neva é ruèda chisc dis passé dal Zimbabwe, l Paisc african olache per n muie de egn se à dat ju Carlo Spagnolli, l dotor trentin che à enlumenà l troi de solidarietà e l é stat l fondament de l’atività de la sociazion fascèna Lifeline Dolomites, vidèda da Claudio Merighi.

Ades tel Zimbabwe l é na neva dotora, na gran ressorsa tant dal pont de veduda profescionèl che uman, te n Paisc olache la situazion sanitèra no la é per nia sorida. L é na joena monia, l’à inom Shyline Maphosa e do n lonch percors de studies ai 19 de oril de chest an l’à arjont la laurea en medejina.

Per rengrazièr duc chi che à fat sia pèrt per ge permeter de arjoner sie ensomech, Shyline é ruèda chisc dis tel Trentin e ence fin te Fascia, olache ai 9 de mé Lifeline Dolomites à endrezà na scontrèda al X Alp Hotel de Pera per ge dèr l met a Shyline e a chi che l’à sostegnuda de se cognoscer e se vardèr ti eies.

De più su La Usc stampèda de en vender ai 10 de mé.  (Lucia Gross)