La Usc di Ladins

L zenter Fascia cresc, en perzentuèla de più che la val de Sora. La lo à confermà la presidenta del Consorzie de impianc portamont Fascia-Ciareja Elisa Maccagni en ocajion de la radunanza de la sozietà Ciadenac chiamèda ite te sala de Consei de Comun de Sèn Jan en mercol ai 24 de oril a la prejenza de 48 sozi e 21 deleghes con l 74,84% del capital raprejentà.

L president Claudio Bernard à palesà gran sodesfazion per n bilanz serà su ai 31 de dezember del 2023 che moscia n utol de 1.133.632 euro respet ai 115.936 euro del 2022. Se à smaorà l vadagn de la vendites da 8.461.444 euro a 10.111.279 (+19,50%) ma se à smaorà ence i cosć de la produzion da 8.716.063 euro a 9.019.315 (+3,48%). Te la sajon da d’invern, da jené a oril del ’23 i vadagnes é stac de 5.144.249 euro respet ai 4.060.944 del an inant (+26,68%).

Investimenc de la sozietà: n resservar de l’èga sun Ciampedie

I investimenc de la Ciadenac via per l 2023 é stac de 4.660.994 euro, de chisc 1.200.000 é jic a comprèr l piazal dai auti de Formié. »Aon fat n gran investiment per i posć auto per esser zacan a post – à dit Bernard. Te Formié aron a la leta 40 posć e autres 70 n aon via Solar ajache la sozietà ge à comprà ju i terens ai frades Tamion.«

Anter i programes l é completèr la sistemazion del portoi Vaiolet1, se endotèr de na strutura de restorazion de proprietà sun Ciampedie e n resservar de l'èga.

Confermà l Consei de Aministrazion

Al orden del dì l era la nomina del Consei de Aministrazion che é stat dut confermà ajache duc se à metù endò a la leta: Claudio Bernard (che bonamenter sarà confermà president), Daniele Fosco, Umberto Anzelini, Daniele Dezulian, Giulio Florian, Ervin Obletter e Fernando Perathoner. Confermà ence l colege sindacal con Denise Pederiva, Francesco Verra e Ivan Noal.  

De più su la radunanza su La Usc stampèda de en vender ai 3 de mé.


 (Monica Cigolla)