La Usc di Ladins

En mercol ai 24 de jugn, tel dì che l’à compì 67 egn, l dotor Fabio Chiocchetti à fenì sie lurier de diretor de l’Istitut Cultural Ladin Majon di Fascegn e l’é jit en penscion dò aer vidà l’istituzion culturala de Fascia per passa 40 egn.

L’era l prum de otober del 1978 canche Chiocchetti, joen da Moena laureà en filosofia a Bologna, tachèa via l’encèria de secretèr te l’Istitut Cultural Ladin, istituzion metuda sù da la Provinzia de Trent trei egn dant.

Ge aea volù mingol de temp percheche vegne azetà sie inom, portà dant tel Consei de l’Istitut dal professor Luigi Heilmann e da Valentino Chiocchetti (Tinoto Maza), n inom sostegnù con forza da l’Union di Ladins per schivèr l risech che l’ICL dovente n post per sofoèr la cultura ladina enveze che per la viventèr.

Defat l’Istitut Ladin de Fascia l’era stat metù sù da Trent desche resposta a la mobilitazion de l’Union di Ladins de Remo Locatin e Danilo Dezulian del Garber, che i volea na Ciasa de la Cultura ladina. Te val l’era jà vegnù fora contrasć con i militanc ladins che i aea tema che vegne fat demò academia e nia de utol per la jent, Fabio Chiocchetti l’era n joen studià capaze e n militant ladin. L se aea jà empegnà tel Grop Ladin da Moena e te l’Union di Ladins jà ti prumes egn '70 te la batalia per n Comprenjorie ladin demò per Fascia despartì da Fiem e enlouta l peis de la militanza ladina te Fascia l’era fort, coscì a la fin l’inom é stat azetà.


De più su La Usc nr 25 stampèda ai 26 de jugn  (Lucia Gross)