La Usc di Ladins

Ai 7 de setëmber dess i mituns y jonins dl Südtirol finalmënter indó podëi jí a scora y scolina. La domanda che an se fej chëstes edemes é plücheater "Co jarán pa a scora?" Scebëgn che les chestiuns davertes é ciamó cotantes, éra impó jüda da definí tl gros co che le jí a scora y scolina dess funzioné. Deache la situaziun corona n’é nia ciamó apajada ia daldöt, messarán tigní cunt cun mosöres de precauziun, mo n secundo lockdown n’ón nia plü avëi, porchël é le motto: "Tan de sigurté che al ó ester y tan de normalité che ara vá".
Incö jöbia ai 20 d’agost él gnü tigní na conferënza stampa en presënza dl assessur ala scora ladina Daniel Alfreider, l’Intendënta Edith Ploner y la direturia dl ITE Raetia a Urtijëi.
"Por le scomenciamënt dl ann de scora él fondamental da garantí sides la segurëza, mo ince na certa normalité y na costanza tl insegnamënt de presënza. Nosc obietif é chël da mëte da jí le plü che ara vá l’insegnamënt de presënza. N ater travert é da ti dé ciamó deplü na sbürla ala digitalisaziun scolastica, por garantí le medemo azes al monn digital ales mitans y ai mituns”, á splighé l’assessur. Tles scores elementares, mesanes y altes dles valades ladines él preodü l’insegnamënt de presënza. Tles scolines él de piceres mudaziuns.

Scolines
I orars de daurida dles scolines ladines sará i medemi co dan l’emergënza coronaviurs. Al restará n tëmp de entrada flessibl sciöche denant. Les mitans y i mituns podará gní acompagná ma da un n genitur o na porsona de majera eté inciariada. Por limité le  plü che ara vá le prigo da taché y se taché le virus, romagnará la composiziun di grups tres la medema. Al momënt n’él preodü por i mëndri ne l’oblianza da tigní les destanzes y gnanca chëra da tó le mascherot. "Les scolines é arijignades ca por respogne te na manira asvelta a caji eventuai de contaje", scrí la Provinzia te n comunicat. Sce al ess da gní a s’l dé infeziuns, gnarál tut les dezijiuns localmënter adöm cun le Sorvisc de Igena y Sanité Publica, la direziun dles scolines y le Comun. Chësc ó dí che n caje de infeziun da covid-19 te na scolina portará bunamënter y aladó dla carantena scrita dant dales autorités, ala stlüta temporala dla scolina. Tl caje che n möt o na möta ais sintoms tratan le de gnarál atira despartí dai atri por döt le de. Al gnará avisé i geniturs che gnará a se do le möt por na vijita dal dotur di mituns o dotur de ciasa.
La regola é chëra che al mëss sté a ciasa düc i mituns y adulc che é en carantena, che á sura i 37,5° de borjú y che mostra sintoms che fej riferimënt al Covid-19. Chësc ne vel nia por na strüscia o desfridada, sce i mituns o l’adult se sënt bun. Al ne pó nia jí ite te na scolina mituns o adulc che á albü contat ti ultims 14 dis cun na porsona positiva o che é stá en carantena ti ultims 14 dis.

Scores elementares y mesanes
Tles scores él preodü entrades y sortides desfarëntes, olache al é poscibil. Sides da jí ite che da gní fora de scora mëss i scolars avëi n mascherot indos, insciö ince ti porti y tratan la pausa, sce ara ne vá nia da tigní le meter de destanza. Chësc meter gnará indere garantí tles classes, porchël n’ól ester iló degun mascherot tratan les leziuns. Sce valgügn á plü co 37,5° de borjú, mëssel sté a ciasa y cherdé n dotur. L’assessur y l’intendënta fej n apel ai geniturs da mëte instësc averda ala situaziun sce n scolar o na scolara ess da jí a scora cun la strüscia o na desfridada.
Tles scores elementares y mesanes él preodü l’insegnamënt en presënza danmisdé y domisdé cun plü o manco l'orar da denant, che vigni scora ti comunicará chisc dis ales families. Al gnará te vigni moda renforzé le laur didatich por n aprendimënt autonom y les competënzes digitales, ince poriva che sce al ess da gní a s’l dé situaziuns de carantena. 

Scores altes
Tles scores altes ladines vëgnel garantí l’insegnamënt en presënza. Al ti gnará ince pité ai scolars y ales scolares la poscibilité da recuperé la pert d’insegnamënt nia fata tratan la perioda de stlüta.

Mensa
Vigni comun dles valades ladines á dé süa desponibilité da organisé na marëna sciöche i atri agn cun dötes les normes de segurëza ajuntives che messará gní respetades.
I podun porchël dí che la scora ladina pó pié ia cun na buna situaziun de scomenciamënt por scolares y scolars y sües families por i numeri che pormët l'insegnamënt en presënza deplëgn.

Scolines y scores ladines: 3.094 iscriziuns
Indöt é scric ite 3.094 mitans, mituns, scolares y scolars te na scolina o scora ladina. 712 mitans y mituns jará te öna dles 17 scolines dles valades ladines, 1.158 scolares y scolars jará tla scora elementara ladina y 680 te na scora mesana ladina. Tl ann de scora 2020/21 sarál 505 scolares y scolars che frecuentará na scora alta ladina y 39 la scora profescionala Cademia.  (osp/pablo)