La Usc di Ladins

L ann che stà per finé via ne desmen­tiaronse dessegur no mai, n ann segné da la pandemia mondiala da coronavirus che à gaujé na crisa sanitara spaventousa, ma à ence metù sun i jenedli l sistem economich y sozial de dut l mond, y ala ne fina nia via chilò. I aron da scombate ciamò n bel pez, i messaron inant fé cont con limitazions, regoles y restrizions te duc i versc y te duc i ciamps.
Ence l mond dla cultura l'à paieda dassen, desche endlonch y duc à ence les Unions di Ladins dles valedes y la Union Generela messù desdì o sburlé a n auter ann – y speron che per enlaouta garàtela –tant che dutes les manifestazions y i evenc culturai. Al é sté sfadious y i son danz ciamò laite te chesta situazion nia saurida, plena de melse­gurezes y ence de festidesc y temes dantaldut per nosta sanité y per chela dles persones che nes é davejin, per l laour, les relazions interper­sonales yii.
Per podei laoré en segureza à ence nosc redadours y colaboradours de La Usc di Ladins messù se adaté al laour a destanza, fé entervistes plucheauter demé per telefon, fé reportajes tegnan ite les mesures y restrizions dedes dant yii. Tant deplù él da ti auzé l ciapel a duta la scuadra de colaboradours de La Usc di Ladins, sparpagnés fora tles reda­zions desferentes de vigni val ladina, che edema do edema, ma ence di per di te La Usc online, se à dé da fé dassen per porté dut l ann te nostes ciases y te nost lingaz dla oma informazion jornalistica, notizies, cronica, cultura, sport yii., con impegn y forza te chestes situazions particolares, de trueps versc ence pesoces y sfadiouses.
N foliet de mendranza stà demé en pe sce al à abonés, sce al vegn sostegnù con inserac y reclams da pert de aziendes y firmes y sce al é ence la man publica che dà sie sostegn. Nadel y la fin dl ann che se arvejineia é dagnora no demé temp de bilanz ma ence l moment da sentì gra y reconescenc per chel che an à ciapé. A inom dla UGLD toli chesta ocajion per rengrazié de cuer duc chi che à daidé y à sostegnù enfin sen nosta ativité jornalistica y culturala, y i invieie inant a nes dé sie suport, sia solidarieté y a tegnì aut l valour dl'unité ladina.
A duc i abonés, letours, soste­gnidours y colaboradours aodi de beles Festes, n bon Nadel chiet y saren y che l Ann Nuef nes porte, en chest iade plu che mai, dantaldut sanité y legreza!  (Milva Mussner, Sourastanta dla Union Generela di Ladins dla Dolomites)