La Usc di Ladins

L’era jt su la sforcela Pordoi co la pouses e tel vegnir jù dal canalon Roma l’é restà sot na levina.

I socorsc é stac ativé angern tel domesdì tèrt dò che l’é stat dat l’alarm entorn les cinch, ajache l joen no era ruà de retorn e no l responea al telefon e i é jic inant, dant ence col jolier e dapò coi droni. Ampò i socorsc à cognù se fermèr per l gonfet e l vent, aboncont entorn les diesc da sera i à podù da nef pontèr via. Enceben la bassa temperatures, desvaliva stazions de socors da mont les se é ruèdes sul post, dessema con i studafech, per didèr a chierir l tous da Ciampedel.

Etienne Bernard l’era un di joegn più aprijié menacrepes e maestres de schi. L’era cresciù te na familia che à semper fat de la mont sia vita e sia profescion. L père Renato Bernard l’é maester de schi e istrutor menacrep. Etienne l dijea che fin da picol jir coi schi e rampeèr l’era semper stat sie jeghes preferii. L’aea fat l Liceo de la mont a Tione e l’era doventà maester de schi de nience 19 egn e menacrep de 21. L’à vivù en prescia, desfrutan de pien sia gran pascion per la mont, e la mont se l’à tout de demò 27 egn, lascian te la desperazion sia jent e destrametui duc i amisc, la Scola de schi de Ciampedel, i menacrepes de l’Auta Fascia e duta sia comunanza.

Entorn Nadèl l’era stat ence protagonist del filmat “Storia di Natale” de l’APT de Fascia, olache l fajea la pèrt del sudà Hermann Walter sul front te l’an 1916.

Sia departida l’é n dolor fon per duta sia val.