La Usc di Ladins

Ne sons'a te n mond che n possa bën dì che l ie scialdi capitalistich y da n gran cunsumism, cun nosc ulëi for deplù y for mo majer y plu lucënt. N possa bën dì che l vën tendenzialmënter spendù dassënn, n pudëssa nce dì »sparcantà«! No pa?
N cont de chësta dinamiches de nosc terzo milené, ie pona l resultat che na cossa y na scumenciadiva porta datrai vel' de bon y de positif y datrai danz nce defin de stlet y negatif, ma suvënz iel nce mez per sort danter positif y negatif. L uel pona vester n cër tëmp per pudëi udëi ce resultat definitif che na cërta idea nueva y si realisazion à purtà.
Per fé chësta cunscidrazions genereles danora ie stat de gauja o la sburdla l gran articul te La Usc di Ladins dl 6 de merz dl redatëur David Lardschneider dal titul »Cunliamënt danter S. Cristina y Ciandevaves«. Te si articul mët nosc redatëur lezitënt sun papier l'argumentazion de Arturo Schenk, che ie presidënt dla sozietà »Alpenpana« y che à metù sun mëisa chësc scialdi gran proiet, che ie nce bele unì prejentà tl Chemun de Santa Cristina y che à nce bele na »storia« de mënsc y de n tëmp scialdi lonch.
L ie dessegur positif che pra la stazion nueva unìssel a s'l dé 250 plazes dai auti, 100 dedora y 150 te na garage basite. L giapëssa nce lerch ufizies de Chemun, n tenissa nce cont di bujëns di mutons, dla jënt de tëmp y de chi che à n handicap. Da udëi positif iel daniëura nce che la stazion tla val ne fossa nia dalonc dal stradon de Gherdëina y nce no dal zënter de Santa Cristina. Chësc smendrëssa daniëura l trafich di auti. Scialdi bones nce la risses dl presidënt Arturo Schenk, che dij: »Ulon crië sun Ciandevaves n raion de recreazion per Santa Cristina y per duta Gherdëina, per ti dé l mesun ala families de pudëi se nuzé dl bel raion zënza messëi furné su cun l auto.« Na cossa drëta y bona al mascimo.
On bele dit danora che pra scumenciadives nueves (che n possa suvënz nce dì capitalistiches y de marcià) pòssel daujin da cosses positives nce sauté ora cosses negatives. Mbën la cossa da mat negativa tl mëter a jì na furnadoia nueva de cunliamënt danter Santa Cristina y Ciandevaves ie danz l'idea scialdi cuncreta che nosc redatëur de La Usc di Ladins à messù audì ora dal presidënt Arturo Schenk, dl viers che duta chësta scumenciadiva y realisazion fossa »l prim var per cunlië da dedò Ciandevaves cun Mont de Sëuc«.
Sun na tela iel sambën l cajo de messëi junté (a chësta analisa, te chëla che l ie unì cialà de vester defin rëidli y obietifs) che na grandiscima pert dla populazion – duta chëla che à a cuer nosc ambient naturel, n gran bosch che ie mo defin uriginel y cunservà bën, te dut chël gran raion dla Mont de Sëuc che va da Pana/Ciandevaves nchin te Sautaria y che ie defin daujin da nosta grupa de Saslonch y Sasplat, che ie nce l simbul »dolomitich« de nosta val – ie de contra cun dut si cuer, y sautëssa su y se parëssa cun mans y cun piesc, diverda che l unissa a s'l dé n tel proiet spaventëus de ulëi frì ite te chël bel raion naturel che nëus on la gran fertuna de avëi y che on danz l duvier feter »sacher« de cunseré per la generazions che vën do nëus y che à nce la »santa« rejon de chësc viers. No pa?  (Oscar Prinoth dl Rezia, Urtijëi)