La Usc di Ladins

Dan doi enes sons jit a pe sa la furcela de Saslonch, l ne fova mo degun trafich ntlëuta.
Ncuei (ai 13 de juni) sons inò jit su, ma l ie stat dut n'autra esperienza, mpede la marueia dl chiet audìven tres su na drëta fuera de auti y dantaldut motores.
Mé drët che n possa se muever y che duc, zënza descriminazion, possa udëi chisc biei crëps. Son nce dla minonga che danter la valedes ladines dëssa dut resté daviert, lidëza de se muever per devertimënt, per lëur y per i cuntac soziei danter ladins.
Mé una na cossa ne me sà nia drëta y zënza respet:
che n possa furné tan debota che n uel (l fossa bën la tofles, ma tla pratica ne n'iel degun cuntroi) fajan na drëta fuera y desturban duc chëi che va a crëp, a pe, cun la roda, duc chëi che ulëssa se goder l chiet tla montes, l chiet che fej tan bon; po' canta sce l ie n valgun auti deplù parchei sun i jëufs.
Sce ie vede dal Jëuf de Sela sa la furcela, via l Comici o a me arpizé su per i parëies dl Sela, ne me desturba nia tan i auti che ie parchejei biei valënc sun jëuf, ma plutosc audì tresora la fuera de chëi che dà gas dassënn su per ch'la raides, desturban l chiet nchin a chilometri dalonc.
Ove bele purvà dan passa 10 ani a furné a 40 km/h su per n valgun pasc: n à de mesaria mé 3-4 menuc deplù per pas. Ma l ie n mënder mpaziamënt dl'aria y manco fuera. É metù a verda plu suënz, sce dantaldut chëi dai motores furnea plan, se pierd la fuera amesa l'autra fueres che ie nce tla natura o la ie a uni moda plu da tenì ora.
Fossa pa chësc massa de damandà? Tl inuem dl'UNESCO, de nosc planet, de n viver la montes te na maniera che paussa corp y ana?
40 km/h, massa n gran sacrifize?
Pu no no, chël purvons'a a fé, zënza spënder milions de euro.
N polizai sun uni jëuf ie assé.
Me éi pa semià che la politica à dit »chësc purvons'a a fé«?
No, ma mbincià dassënn me l éi!
Sarà pa bën nce ajache son nasciù sun Sela y é vivù i prim ani de mi vita che la fueres fova d'autra fueres: i scibli dla muntanioles, i curnacins, la levines che univa ju de Saslonch d'ansciuda: Viva l chiet tla natura!  (Markus Senoner, Sëlva)