La Usc di Ladins

Canche la smueia ova ruinà la trassa dla furnadoia de Dantercëpies ala fin dla sajon da d'inviern 2012/2013, se ova l diretëur dla sozietà Giovanni Pasti damandà na ancunteda per nes mustré l proiet dl mplant portamont nuef. Davia che la vedla trassa ne pudova nia plu unì nuzeda, fòvel de bujën de n crì n'autra, cun la cunseguënza de messëi taië mo lëns y splané coi.
Nëus dl cunsëi dla Lia per Natura y Usanzes se an damandà sce la sozietà Dantercëpies pudëssa rembusché la vedla trassa sentan lëns y senan ite ierba sce de bujën. L diretëur Giovanni Pasti nes ova dat la parola che chësc vën zënzauter fat, nce sce l schi club ova damandà sce n pudëssa njenië ca chësta riva coche purtoi per fé cun gheneda si alenamënc. Avan crëta che la parola data vel, ne se ons nia plu tan cruzià dl fat.
Da n valgun dis incà vëijen coche chësta riva, che ëssa messù unì renatureda, vën splaneda y njenieda ca coche purtoi dai schi. Mplu àuden che l purtoi nuef ne n'ie nia per l schi club, che pudëssa tlo se alené cun gheneda, ma per spartì miec i schiadëures.
Uni viertla ie bona. Ne sà pa chësta jënt nia che n purtoi ërt tira mo deplù?
Chël che a mi me desturba deplù ie che la parola data, monce da na tel persona, ne n'à degun valor. Povester à la parola de vel' personaje n tiermul?
L resta na bona scola per l proscimo iede.  (Engelbert Mauroner, Urtijëi)