La Usc di Ladins

Gara por le »Re dla Falda«
Te na gara dër particolara, cun percurs danter portes y ostacui, gnarál incoroné le »Re dla Falda«. L’apuntamënt cun le telemark é en mercui ai 20 de merz da sëra, sön la pista »Doninz–Gardenacia« a La Ila
Düc i amisc dl telemark, prinzipianc y progredis, simpatisanc y nia, é inviá ala festa dl telemark »La Falda«, en mercui ai 20 de merz dales 20:00 ales 22:00, sön la pista »Doninz–Gardenacia« a La Ila. Te chësta secunda ediziun d’La Falda gnarál incoroné le Re dla Falda – le telemarcher plü asvelt dla serada. An fajará la gara classica a tëmp: dal mëteman messará le concorënt sburlé por fá na gran ota, dedô trá n salt olache le concorënt ará da arsí en telemark (na juria valutëia la dërta posiziun, zënza él penalités). Ara vá inant cun l’ultim toch de gara, indô sön n percurs de portes. L’elm é obligator. Do la gara sarál n pice party tl restorant pizzeria »La Bercia« a La Ila. Informaziuns sot a info@uslaila.it o por WhatsApp al 329 8627658.

La persona (Im)perfeta
La mostra culetiva vën giaurida n vënderdi ai 15 de merz dala 20:30 tla galaria Vijion a Puntives
For de plu vën la persona trata ite te n cërtl ulache conta n prima l cialé ora. Dantaldut tl mont digitel, che nës sëia y cundiziuneia for deplù la streda, nes mostra n mont perfet ulache l valor fisich vel sëura i sentimënc y l’emozions. Nsci vëniel fat ntervënc de uni sort per se adaté a chëla mesures y a chëi valores. Ma sambën ie la sëida danter ntervënc che juda al bënsté dla persona y chëi che la met n pricul, scialdi strënta.
I 10 artisć, Julia Runggaldier, Marlies Baumgartner, Max Brenner, Paola Grott, Stefan Perathoner, Klaus Rungger, Valeria Stuflesser, Leo Ferdinando Demetz, Josef Kostner y Marko Kostner, uel nes sensibilisé dl viers, che nia mé l’estetica conta, ma nce la persunalità, l’individualità y la carateristiches persuneles de uniun. La mostra resta davierta nchin ai 8 d’auril, dal lunesc ala sada danter la 4 y la 7 domesdì, o cherdan su l numer 3382098697

John

• 
•  

View the embedded image gallery online at:
https://www.lausc.it/manifestazions-y-evenc/26674-manifestazions-atuales-speziales#sigProId392063c277

Scofield al Dolomiti Ski Jazz
Ultimes dis del Festival con notes ladines te Museo e talenc internazionèi te Navalge
L é amò pec dis per se emprevaler de la proponetes de musega de gran valuta del Dolomiti Ski Jazz.
Anché vender ai 15 de mèrz l jazz se entenc coi colores ladins tel Museo a Sèn Jan, olache l badiot Alex Trebo sona da les 18:00 ensema con Manuel Randi. Da les 21:00 dapò sarà la Jam Session a La Grenz a Moena.
Doman sabeda ai 16 sarà l moment de maor prestije de duta la manifestazion: da les 21:00 tel teater de Navalge a Moena ruarà l chitarist de nonzech internazionèl John Scofield. Ensema con Jon Cowherd al piano, Vicente Archer al contrabas e Josh Dion a la bateria l portarà dant l program »Yankee Go Home«: n apuntament da no se lascèr sciampèr.
L dolomiti Ski Jazz se sera su en domenia ai 17 de mèrz sun Pampeago da les 12:00 con Evi Mair Quintet. Program su www.fassa.com.

»Ncantëur tl bosch« – iscrizions
La Lia Gaia mët inò a jì l proiet da d’instà »Ncantëur tl bosch«, per mutons y mutans dl 2018-2020 y na segonda grupa per l 2013-2017
L proiet va inant per nuef enes, dai 24 de juni nchin ai 23 de agost: la prima doi enes a Puntives, pona cater enes te Sëlva sun Daunëi y daldò inò trëi enes a Puntives. Aldò dl spirt de Gaia se tràtel de n fé damat liede tl bosch, ti lascian lerch ala criatività y scuvierta dla natura, renfurzan l bënsté y svilup persunel. I mutons y la mutans sarà for acumpaniei da zachei de cumpetënt.
Respet per la natura y i autri, viver y mustré nosc sentimënc, comuniché cun la rujeneda dl cuer y manieres de resolver cunflic a pèr; chëstes ie n valgunes dla tematiches che nes stà a cuer y che vën vivudes dant dai acumpaniadeures.
N possa purté i mutons y la mutans dala 07:45 y unì a i tò dala 14:30, o sun dumanda nce dala 12:30. La iscrizions vën tëutes su da n lunesc, 18.03. dala 07:00 inant nchin a n vënderdi, 22.03. tres l formuler sun www.pro-gaia.net.

Dajon nce nëus na man per Pasca
N vënderdi ai 22 de merz dala 09:00 inant sun Pitla Plaza de Sant Antone a Urtijëi
N vënderdi de chëst’ena che vën sarà ntan dut l di na mëisa ulache ulenteres dla sezion de Bulsan dl’AIL venderà de biei ueves da Pasca de ciculata.
L’AIL ie na lia per la nrescida contra la malaties dl sanch coche leucemies, linfoms y mieloms. Te Südtirol ie la grupa unida metuda su dan 26 ani, tl 1997, da parënc y parëntes de amalei y amaledes, dutores y dutrësses y n generel persones che lëura o à da nfé cun la cuestion. L’AIL à finanzià truep proiec de nrescida che à purtà pro de fé de gran vares inant tla nrescida y danter l auter nce judà a njenië ite l repart de ematologia de Bulsan.
Nëus de Gherdëina ulon ënghe judé pea cun chësta azion y rengrazion bele danora.