La Usc di Ladins

Che pelel fèr n joen al 5° an de liceo artistich, canche la limitazions per l coronavirus ge empon ge stèr entorn cèsa e les risia de ferèr ence sie estro creatif? Ismaele Soraperra, joen student e fi e nez d’èrt (respetivamenter de Claus e Virgilio de la Zoch) l’à troà sia forma de esprescion tel depenjer la strèda sot cèsa.

Via per chesta setemèna l’à tacà a fèr vèlch fegura: na femena cucèda jù che spieie l se serèr daìte te se enstesc e ence l dolor, dapò doi musc de n veie e de na femena che se vèrda, desche te n amor da dalonc.

En jebia se à slarià fora la burta neva che l covid-19 se à portà demez ence un di gregn autores de la letradura mondièla, Luis Sepúlveda, e chest l’é stat ben segur n argoment tout dant ence con la professora Silvia Murer, che à ispirà Ismaele a cerner l scritor cilen desche soget per sia èrt.

Coscì te pech temp, ma gran lurier e gaissa, su la strèda sot majon de Ismaele à ciapà forma n bel retrat de Sepúlveda. “No l cognoscee ben - disc Ismaele - ma aee let vèlch e me à sapù na bela idea chela de recordèr na persona che ge à trasmetù al mond conzec positives e amor per la vita. É troà ence n sens che lea chest dessegn a chi che aee fat dant: l’é l’amor, l’é l dolor, ma sot ite dut l’é semper l’èrt, la poesìa e la letradura.”

A livel tecnich per fèr chest dessegn Ismaele ne conta che per aer la proporzions giustes, ajache l’é belebon gran, l’à fat na grilia sul dessegn picol e dapò l l’à reportèda sun strèda e l se à enjignà i colores con śes e pigmenc che l’era te boteiga, i fajan jù te stampes didà da sie père. I à cognù n fèr jù de neves ogne dì, “chi compré no i jissa – l disc – perché l’asfalt no l’é lizech. Coscì encolorir l’é più senester, ma chest dèsc n bel efet, na pixture naturèla.”

Bastassa na pieveta e dut l lurier de Ismaele desvanissa, ma chest per el no l’é n problem. “Ence chest me pièsc – l disc. Te chest moment che somea che ence l temp se abie fermà e che nia ne mosce l passèr del temp fora che l soreie e la luna che se tol l post sul ciel, é cernù per la pruma outa chesta tecnica che dèsc testimonianza di dis che passa e se porta via dut.”

Ismaele l fèsc l 5° an al Liceo artistich, tel cors feguratif, e n auter an l volessa jir a l’Academia de Bela Èrts  a Bologna a fèr pitura. Ampò per el, desche per duc si compagnes, l’é dedant la gran malsegureza di ejames de matura. “Se per i 18 de mé no se va de retorn a scola, cognaron fèr la matura on line e sutassa la pruma e seconda proa. Gé no fosse trop content de chest – l disc - perché l’é n muie più bel aer n dialogh con la persones e rejonèr de chel che se à fat te chisc egn, peisse che chest dae maor segureza e sodesfazion che fèr n ejam demò virtual.”

 (Lucia Gross)