La Usc di Ladins

Te chisc tempes grieves per noscia sanità l’ospedèl de Ciavaleis se à desmostrà amò n’outa n presidie sanitèr prezious per la jent de Fascia. Defat n muie de fascegn che é stac enfeté dal Covid-19 é stac porté prum de dut te chest ospedèl forin Fiem e te n muie de caji, se per grazia la situazion no era massa grieva, i à podù vegnir curé aló e dapò vegnir de retorn a cèsa.

Apontin a chest ospedèl l’é jit l pensier di volontadives de la Picola Solidarietà de la Val de Sora, na sociazion che se dèsc jù da passa 20 egn per didèr jent che à besegn, tant te val che fora de val, per ejempie per l laboratorie sozièl e l’ANFFAS, ma ence per i teremoté de l’Abruz, olache l'à portà de gregn didamenc.

La sociazion, con la presidenta Paola Dellagiacoma e la secretèra Serenella Manfroi da Ciampedel, met a jir da egn scomenzadives desche chela de vener la corones de avent, ma ades l picol grop de cater o cinch volontadives no l’à più n muie de atività per tor sù bonamans per didèr chi che à besegn. L’à pissà donca de domanèr l didament de la jent.

»Te chest moment grief e delicat – ne à dit Serenella Manfroi - aon pissà che l’ospedèl de Ciavaleis l’é l prum pont de referiment per chi che se mèla e donca aon pissà de ge dèr na man. Ge é domanà a n amich infermier da Ciampedel che laora apontin fora Ciavaleis e l’à dit che l’é na bela idea chela de averjer na sotscrizion per l’ospedèl.

Envion donca duta la jent che volessa e podessa ne didèr te chest projet a dèr n contribut sun nosc cont te Cassa Rurala Dolomites, IBAN: IT92P0814034490000008004173 e scriver che l’é per l’ospedèl. Tolon sù chesta bonaman amò per n trat e dapò ge faron aer chel che vegn sù a l’ospedèl. Ge domanon ence che i ne fae saer coche vegnarà durà i scioldi, a na vida da poder meter en consaputa duc chi che dèsc n contribut«. 



 (lg)