La Usc di Ladins

L Covid – 19 à abù n impat negatif sun duc i setores de l’economia, anter chisc l’é zenz’auter ence l marcià imobiliar. Aldò de na analisa portèda inant sun 20 zitèdes del mond, descheche referesc Il Sole 24 Ore, vegnarà premié i marcé che à sapù gestir miec l’epidemia opura chi che à na mencianza de ofertes tant cronica, che i pel seghitèr a contèr su na domana auta. A padir de più bonamenter somea che sarà la gran zitèdes olache tropes proprietaries e jent a fit é dò che palesa l’intenzion de lascèr la zità no demò per l fin de setemèna ma ence per jir a viver a na vida stabola te raions più periferics.

Per entener miec i efec de l’emergenza sanitèra ence te nosc teritorie te chest ciamp, aon rejonà con Lucio Santini e Carolina Chenetti, referenc de l’agenzia de Moena de Tecnocasa, grop de intermediazion imobiliara e de mediazion del credit a livel talian e european.

"Inant da l’emergenza sanitèra co erela la situazion del marcià de la cèses? - Ti mesc de jenè, firè e scomenz de marz de chest an aon laorà polito e serà sù più vendite che tel medemo trat de temp del 2019".

"Él mudà vèlch ades tel marcià imobiliar? Secondo voi co podessel se svilupar tel davegnir? - Per endana l’é ancora massa prest per poder valutar eventuai mudamenc tel marcià. Chest depenarà trop da la situazion economica olache se troerà la Talia ti mesc che vegn. Ben segur, na rezescion o aboncont na crisa economica no aiderà l marcià imobiliar e i priesc podesse jir jù da nöf".


Lejé duta l'intervista su la Usc nr 23 stampèda ai 12 de jugn  (Cristina Marchetti)