La Usc di Ladins

»Che él pa chela strutura de fer aló dal parch di jeghes de Cianacei?« domana de spes i ghesć che se fèsc na raida te val. La »piramida«, coche vegn chiamà la strutura de Cercenà, no la é sul tegnir del Comun de Cianacei, ma sun chel de Ciampedel, la é de la sozietà Valeron srl, e en costruzion oramai dal 2006 per fèr n alberch, ma vèlch é jit revers e la é restèda aló, da fenir, n grum de fer serà ite a cantier.
Chest dèsc più che un problem: l pericol de n cantier, la parbuda del teritorie e no ultim n clim olache se sparpagna i moscolons che é d’empaz soraldut per chi che pratega l parch per i bec. Ades somea ampò che zeche se aesse moet.
»En lunesc ai 20 de messèl – à dit l’ombolt Ivo Bernard – la Valeron à avert l cantier sot la vida de l’enjenier Luca Morassut, che à tout l post de Enzo Soraperra desche diretor di lurieres. Vegnarà arbassà la strutura per la portèr a l’auteza perveduda dal projet originèl sanan coscita l’abus, ajache i volumes era fora de n bel toch. A chesta vida dapò sarà possìbol realisèr l projet originèl o fèr n nef projet, roba che no era possibola fin canche l’era l’abus, per chest nesciugn volea comprèr. L Comun se à dat da fèr per ruèr a na soluzion, ajache da na situazion de concordat se é rué a na situazion de faliment e se aon cordà anter i avocac del Comun, chi del faliment e chi de la Valeron de dèr na proroga de 6 meisc per poder fèr i lurieres per sanèr l’abus e de verifichèr che la banches che à credic autorisee l paament de chisc lurieres. La firma che à avert l cantier la cogn ben segur ence l sanifichèr per poder lurèr laìte«.

De più su la Usc stampèda di 24 de messèl, olache se pel lejer ence l’interogazion portèda dant dal conseier ladin Luca Guglielmi e la posizion de Enzo Soraperra Valeron.  (Daniele Verra)