La Usc di Ladins

L’é n istà particolèr chest del 2020. N muie de evenc gregn metui en calandèr ti meisc de messèl e aost à bele cognù vegnir descancelé o sburlé per via de la restrizions a cauja de la pandemìa da Covid-19 che amò no ne lascia deldut rechia.
L’idea di Comitac manifestazions l’é stat da sobito chela de no lascèr jir dut dò brea jù e de fèr l possibol per endrezèr amancol vèlch scomenzadiva e apuntament per i ghesć che rua te val a passèr sia vacanza.
Via per d’aisciuda someèa empossibol ruèr a meter per strèda vèlch event. Enveze la situazion é miorèda dì per dì e coscita se à podù veder na lum junsom l tunel fosch.
Ence la Comiscion per la cultura, l’ecumenism e l dialogh interreligious de la parochies de Fascia, sot l coordenament de Cesare Bernard, é stata bona de endrezèr la 11^ edizion de la rassegna »Ispirazions d’istà«. Na rassegna chest’outa mendra che aboncont auza fora temes e argomenc de spessor, leé a fil dopie da la cultura e la religion. Ispirazions d’istà l’é una de la pecia scomenzadives da d’istà che tol ite duta la val e ence chest an la Comiscion à vardà de se slarièr fora più che l’é stat meso. I protagonisć é beleche duc jà cognosciui, l’é i amisc de Ispirazions d’istà, ghesć aprijié che ogne outa porta valores neves e fèsc nascer ispirazions e reflescions che aur neves orizonc.
Chest an la Comiscion à abù l gran didament di desvalives Comitac manifestazions per l’endrez di evenc e per ge jir dò a duta chela desposizions che ge vel osservèr, apede se sà ben al sostegn semper prezious de l’Apt de Fascia e di Comuns.

De più su La Usc 29 de vender ai 24 de messèl  (Monica Cigolla)