La Usc di Ladins

Chest uton, per via de la situazion de emergenza sanitèra che no permet nesciuna ocajion de sozialisazion, ence la Crousc Checena de Fascia no à podù endrezèr sia scomenzadives per regoer bonaman. Dachelanvìa la responsaboles de l’area sozièla, descheche ne à fat a saer la referenta Annalisa Zorzi, se à pissà de meter a la leta sia marmelèdes fates te cèsa da sporjer desche dons da Nadèl. Per chi che preferesc l salà l’é a la leta ence na sos de carates rosses, n compot sciorf da magnèr apede ai formaes e la cèrn boìda e verdures sot ele. Dut chest vegn fat ite te na belota confezion. A chesta vida, con la bonamans che vegn tout sù, la Crousc Checena podarà didèr fora families o persones de noscia val che à de besegn de didament, la pel meter a la leta stipendium per studenc meritegoi e didamenc umanitères internazionèi. Per prenotèr i cocoi de marmelèda o de compot se pel scriver na mail a amministrazione@crifassa.com o chiamèr Giusi al numer de telefon 0462 764031 da les 8 a les 12 dal lunesc a la sabeda. Tel cajo che vegne ordenà più che cinch cocoi la Crousc Checena pel ence i consegnèr diretamenter a cèsa.  (Monica Cigolla)