La Usc di Ladins

Doman l’é l dì de Nadèl, n Nadèl desvalif, che rua te n moment senester segnà da la pandemìa da Covid-19. Chest an donca n Nadèl più resservà, più spritual, na festa de orazion, de converscion, che ne envìa a pissèr sora ai valores de la familia, de la fe, de l’amicizia, de la vita e de la solidarietà.

Per chesta festa da Nadèl ence don Andrea Malfatti e don Mario Bravin vel ge fèr a duta la comunanza de Fascia i più bie augures.  

»Che chest Nadal, pien de cruzies e malsegureze – disc don Andrea - ne recorde che Gejù l’é l Salvator e che l vegn a ne librar da dute nosce poure e tribolazion.«

»Ge augure a duc de no perder mai la speranza – disc don Mario – percheche la speranza l’é l motor de la vita e Gejù l’é Chel che l porta la speranza più grana«.

I paroches de Fascia fèsc a saer che i oriaries de la messes per chisc dis che vegn é da poder troèr sul sit decanatodifassa.it e su la piata Facebook. La messa de chesta sera, vea de Nadèl, da les 20.00 a Pera, vegn manèda fora en streaming su la piata Facebook Parrocchia Val di Fassa e doman se pel scutèr la messes da les 9.30 e da les 17.45 sun Radio Studio Record.

Su Facebook se pel veder ence l bel video coi augures de Nadèl che à endrezà l Grop Joegn de la parochies de Mazin, Pera, Poza, Soraga e Vich.

 (Monica Cigolla)