La Usc di Ladins

L esser vijionarie de Diego Perathoner, l’evoluzion di materièi e de la tecnica, la carateristiches che fèsc de la Sellaronda Skimarathon na gara unica, spetacolara: i é stac dalbon sacotenc i temes porté sun paladina en jebia passèda, en ocajion di 30 egn de la competizion. 

Sun paladina del Chino Marmolèda l é entervegnù desvalives atlec con recorc e testimonianzes per festejèr la trenta edizions de la garejèda, nasciuda del 1995. Tras video mai publiché, l publich à podù fèr n viac te la istoria de chesta manifestazion, descorian ence tras la ousc di protagonisć percheche chest apuntament l é tant spetà e de valuta tel mond de la pouses.

La sera, endrezèda la vea de la competizion del cedean, é stata averta da Daniela Perathoner, secretèra generala del comitat de endrez: »Diego, ensema con vèlch amich l à inventà chesta gara che ge va do a n percors dalbon matuscel: corer de net sui portoes da schi l é stat enlouta na invenzion revoluzionaria. La Sellaronda fèsc pèrt de la istoria del alpinism«. Sessaben l é stat uzà fora n rengraziament ai volontadives, che dèsc l met de renovèr chest apuntament ogne an a la fin de mèrz con de gran emozions. Per cont del president Oswald Santin, che l é entervegnù endèna la sera, la condizions del temp l é l fator che peisa de più sul endrez de la gara.

»Diego l é stat n vijionèr, n imprenditor leà al mond di lifc che à lurà per la pouses… chi che no paa l schipas!«, coscita l é peà via la moderazion de la meisa torona da man del giornalist Silvano Ploner, che à tout ite con fèr lijier tant jent sun paladina che testamonesc te sala.

De più su La Usc stampèda de en vender ai 29 de mèrz.   (Nicoletta Riz)