En sabeda passada l Segnoredio se à tout apede el sun Paradis Wilma De Col. L’aea demò 58 egn, Wilma, la era ruada te Fascia da la provinzia de Belun, da San Tomaso Agordino, la se aea enciasà a Pera e la se aea fat ite te la comunanza. La era semper desponibola per far volontariat e per didar te la parochia, la era de bon cher e l’aea le man de or.
En lunesc ai 25 de marz la gejia de Pera la era piena de jent, persone che aea abù ocajion de spartir con Wilma mingol de empegn te una o l’autra sociazion o ocajion, che aea abù da ela na parola bona, n consei o n grignot. So empegn te la parochia l é stat recordà da don Andrea e ence te le orazion: l é stat e la seghitarà a esser n ejempie per n muie de persone.
La se à dat ju con gran desponibilità, te la familia e te la comunanza, fin al uton passà, canche l é ruà i prumes segnes de valch che no jia, i controi e la conferma de n mal che te pec meisc ge l’à portada demez a so om, Paolo Bernard de Nato, a le fie Serena, Evelin e Eleonora, ai nec che ge volea tant ben.
Col retrat chiò apede, fat l istà passà te Val de Sèn Nicolò per la Festa ta Mont, olache desche semper la se aea metù a la leta tel stont de Bambi, le volontadive de la sociazion per i bec con problemes de sanità vel ge sporjer l ultim salut.
De più su La Usc stampèda de en vender ai 29 de mèrz.
