La Usc di Ladins

N mierculdi sëira ai 2 de setëmber iel stat la giaurida dla 26ejima edizion dl'Unika sun l puent de Setil. La muderazion ie unida fata a puntin da Beatrix Unterhofer. La manifestazion ie pona jita inant, per la cumpëida limiteda de nviei ala giaurida, tl Zënter dal Tennis curì a Runcadic, ulache la mostra ie pona devierta per duc da n juebia ai 3 de setëmber nchin a n dumënia ai 6 de setëmber.

Coche à dit l presidënt Christian Stl Holzknecht. "Per chësta edizion n particuler ulons fé da puent per cunlië tres l medium dl’ert nëus danter artisć, nëus cun l’autra jënt y n generel cun l mond. L ie bën vëira che la tematica/simbol ie l puent, ma l ie da dì che i lëures dl’Unika ie duc a tema liede. Chël ie for stat nscila dal’Unika, per ne limité nia la criatività de chiche va a fé i lëures d’ert. L simbol dl puent ie pona nce unì tëut ca per la giaurida propi sun puent de Setil n mierculdi da sëira, mé per chiche fova nvià. On metù ju sun puent n tepih y n valgun lëures, y da dedò sons jic duc deberieda ora tla mostra a Runcadic."

Per n vënderdi ai 4 de setëmber dala 20.00 iel unì metù sun l program l dialogh danter Mauro Corona y Andrea Baffoni, dal titul "Prufezia. Sce l’ert unissa scuteda su". Stl: "L se trata de doi persunajes che sà da rujené de ert, che ie esperc. Corona ie nce scultëur y à na gran pascion per nosc artejanat y per la valeda de Gherdëina n generel. Baffoni ie n critich y dantaldut storich d’ert che lëura bele da cin’ ani incà cun l’Unika."

David Lardschneider

Foto: Cumëmbres y cumëmbri dl’Unika, cun l’autoriteies, n ucajion dla giaurida dl’Unika 2020 sun Puent de Setil.