La Usc di Ladins

Gherdëina ie na valeda che truepa jënt chier ora per passé n valgun dis de vacanzes te nosta cuntreda de marueia, nce truepa jënt cunesciuda dl mond dl ntratenimënt y dla televijion. De agost fòvel te Gherdëina Danilo Bigioni, che sona tla band dla trasmiscion »Stracult« de RAI 2, meneda da Andrea Deloglu.

L ie na storia de amor, chëla de Danilo Bigioni y Daniela Pieri: l ie l ann 2019, te Cësa de Chemun de Sëlva, dan al ambolt Roland Demetz; Daniela Pieri ti dij de sci a chël che devënta si uem, Danilo Bigioni.
Danilo Bigioni ie bassista tla grupa »Statale 66« y ala trasmiscion de RAI 2 »Stracult«.
La grupa de mujiga »Statale 66« ie stata da udëi regularmënter sun RAI 2 pra la trasmiscion »Stracult« ti ani y mënsc pre-covid. N sperova che i pudëssa inò suné y cianté tosc, ma sambën che l ie stat da aspité da coche se ëssa svilupà la situazion. Ma ntant iela tan inant: ai 7 de setëmber à la trasmiscion inò pudù scumencé na sajon nueva. Danz che ntant ài inò fermà dut, per cuntroi anti-covid tla sënta dla RAI a Roma. N spera de scumencé inò ala fin dl mëns, de lunesc sëira, mpede de juebia coche preudù.
La grupa »Statale 66« sona y cianta dal vif cianties y colones sonores cunesciudes dl chino stracult, te n aranjamënt nuef tres si carateristica che va dl viers dl surf/rock/ doo-wop. Danter l auter à la grupa sunà y ciantà cun ghesć te studio de RAI 2, coche Claudio Simonetti (Goblin), Maurizio De Angelis (Oliver Onions), Patty Pravo, Carlo Verdone, Donatella Rettore, Abel Ferrara, Mal di Primitives, Edoardo Vianello, Sammy Barbot y trueps d’autri.

Deplù tla edizion stampeda di 18 de setëmber.

David Lardschneider

FOTO: Danilo Bigioni y Daniela Pieri vën uni ann te Gherdëina. I se à maridà tl 2019 te Chemun de Sëlva. Bigioni sona tla grupa »Statale 66«, tl program de RAI 2 »Stracult«. N ucajion dla noza se ài furnì da catif, ël cun la brea de pel y l śarner y ëila cun l diendl. Che toma tl uedl ie la berba da Andreas Hofer de Bigioni.