La Lies de Turism de Gherdëina lascia a l savëi che ntant iel bele njenià l "Covid-19 Test Center" per uperadëures y cunlauradëures dl turism y per seniëures te Gherdëina.
N valgun dis dan che la sajon da d’inviern puderà ufizielmënter scumencé unirà l Test Center ativà. Da pert dla Lies de Turism de Gherdëina ti vëniel metù a cuer a si cumëmbri, "per vester da ejëmpl y per finaliteies de image," de se lascé fé l test regulermënter, uni doi enes, sibe i patrons che i cunlauradëures. Chiche fej regulermënter l test giaperà l recunescimënt "Tested Staff", cun la scrita da taché su "Safe Hospitality - Tested Staff", che unirà nce metuda ite - ma mé dala Lies de Turism de Gherdëina - tla plata internet www.valgardena.it, deberieda cun na icona aposta danter la "Top Icons".
L zënter per se lascé fé i tests ie te Sëlva tla Cësa de Cultura. I tests antigenics per i cumëmbri dla Lies de Turism costa 12 euro. Bele do puech tëmp giàpen l resultat. Per i nia-cumëmbri y per i seniëures costa l test 25 euro.
David Lardschneider
FOTO:
Turism: l test antigenich possa - tosc - unì fat te Sëlva, n valgun dis dan l scumenciamënt ufiziel dla sajon da d’inviern.
