La Usc di Ladins

Chësc ne sará nia n pinsier por maledí indó n iade i smartphones, tablet y ci sái ciamó. Dles conse­ guënzes che ai pó avëi él gnü scrit libri intiers, y ala fin mëss vignun y vignöna sintí te se instës sce y tan che al ti fej bun o manco. N aspet ch’i oress indere porté a löm y poa – che me vá dabestia söi nerfs – é che chisc aparac mëss dagnora avëi la prezedënza. I me pënsi che al nes sides sozedü a düc nos che i s’la cuntun cun na porsona, te chël ciafera spo telefon o n whatsapp y oj atira l’atenziun sön l’aparat, tol magari jö y tl piec di caji se fejera na ciacolada lungia, nes lascian iló a d’aspeté sciöche de te’ tec. Le discurs ch’i ên tl fá pél che n’ais nia plü gran importanza y bonamënter vál do l’ega fora. Magari l’unse ince nos fat ti confrunc de d’atri – sambëgn ince sozedü a me, i ne l’ascogni nia. La colm é indere stada dan val’ edemes, canche i ti á telefoné a na porsona por ti fá les aodanzes che ara complî i agn. Tratan la telefonada m’ára damané sce ara podô me cherdé zoruch dedó, deache n ater telefon ti sonâ. I dá pro che n pü’ m’ára parenté y cuaji cuaji n’essi gnanca plü tut jö canche ara á cherdé zoruch. Bëgn, por chësc iade ái ciamó lascé trá dant la buna cherianza.
Mëssera ester?... me ponsâi. Él poscibile che al ti vëgn tan gonot dé la prezedënza a chisc aparac, che splundra ite te vigni discurs zënza damané, y ciafa döta l’atenziun dla porsona ch’i baiun? I feji n confrunt: ci fajesson pa sce al gniss fora de nia na porsona da üsc ite tratan ch’i baiun cun zacai d’atri – zënza damané, rumpiss nosc discurs gnon cun döt val’ d’ater? Bonamënter ti dijesson da aspeté y magari ti desson ince na burta vidlada, pói m’imaginé. Ciodí ne pó pa spo nia aspeté ince chisc aparac? Y sce al é propi zacai che an mëss respogne, aratassi buna cherianza da damané la porsona cheépronossceipoduntójö.Al n’é daldöt nia respetus te sü confrunc da la mëte te n ciantun y lascé dagnora trá dant chi che telefonëia o scrí. La porsona che é dailó dess da me infora avëi la prezedënza... dagnora!