La Usc di Ladins

Les trëi jones co fej pert atualmonter dal Trio Mandili é Tatuli Mgeladze, Mariam Kurasbediani y Tako Tsiklauri. Le trio vën dal raiun Chevsureti/Chevsuria, na regiun de munt nord-orientala dla Georgia atuala. Aladó dla tradiziun locala se prejentëires con le mandili (la ciüria torona tipica de lana de biescia) y con le panduri (na sort de chitara georgiana).
Na carateristica dles trëi "Mandili" é che ares tol sö sü videos enstësses dal vi con en smart-phone, varienn fora por strades, trus y posć de söa patria. Dal 2015 á en so video sön youtube con na ciancia dal titul Apareka arjunt miliuns de odüdes, aldedancö á cösta ciancia passa 6 miliuns de vijiuns. N’atra ciancia, dal titul Garigeba, á tosc chi 12 miliuns de vijiuns sön youtube.
La ciancia che nos prejentun encö por la fin dal Ann Vedl porta le titul "Iebi" (por ladin: "Violes").

https://www.youtube.com/watch?v=-kI5E4dNDKw&list=RD-kI5E4dNDKw&start_radio=1

La ciancia dij:
I mo rercordi da avëi coü ciöf y da i avëi ficés te tü ciavëis. T’ês tan bela, dertan che l’ont armerea fëies y rames. I mo recordi de nos dui adöm y tö dër bela dertan che te tignîs tla man les violes börnes y n’ês nia bona da mo ciaré fit tai edli dal porí spaia che t’ês. Mo canche al ea gnü la fin, sunse romagnü su, deache te t’âs ennamoré d’en ater. Te ne orês mai plü gní da me, deache en ater t’â atrat. T’ês sparida tla scürité y iu sun resté endó su con les violes börnes tla man.  (Iaco Rigo)