La Usc di Ladins

Chësta sabeda ai 9 de jená vëgn ascurada da na burta desgrazia, che ti á costé la vita a Paolo Pitscheider, 50 agn de Badia. Aladô dl comunicat ciafé dal Socurs Alpin dl Venet, êl pié ia dala Capanna Alpina demez deboriada cun dui compagns, por jí a fá na schitour. I trëi é jüs sö por Valon de Campestrin, rovan söinsom le Ciaval y Casale. Da dailó orôi s’araité jö cuntra Val de Travenanzes. Dales informaziuns che i un dal Socurs Alpin dl Venet, éra sozedüda püch sot la piza. I dui compagns é gnüs jö un al iade y canche ara ti á toché a Pitscheider, ál abiné n gunfo de nëi y é tomé, meton man da raité jö tres plü debota. La nëi destacada se l’á tut impara por chi 900 metri tl valun dlungia chël che ai orô jí jö. L’alarm é gnü dé defata do les 11 dai dui amisc instësc, che á podü dé dant les coordinates. Söl post él rové le joler dl Suem da La Pli de Ciadura, che á metü man da chirí l’ël da lajö sö. Püch dedô á le Artva dl joler ciafé le segnal dl schialpinist. I socoridus á insciö metü man da le chirí, ciafan baldi le corp zënza vita, sot 80 cm de nëi. Le personal medich che ê intratan gnü joré adalerch, á ma plü podü constaté la mort dl ël. Le joler á impröma condüt a val i dui compagns y á spo fistidié da jí a do le corp.
Paolo lascia zoruch la fomena, mituns y familiars. A d’ëi i vál les condolianzes plü sintides ince da nosta pert, y che Paolo pois palsé tla pesc de Dî.  (pablo)