La Usc di Ladins

Dui agn alalungia ti á le Consëi de Formaziun d’Al Plan dediché ala tematica dl’ega. Agn olache al é gnü organisé de vigni sort por informé sön chësc bëgn tan prezius, y dantadöt ince por sensibilisé la jënt da fá bel impara. En sabeda ai 23 de merz él garaté le gran final, cun la premiaziun dl quiz y ince cun na manifestaziun particolara: na cercia de eghes deboriada cun n sommelier.
Por chësc domisdé te salf dles manifestaziuns, á le presidënt dl Consëi de formaziun Gustl Kaneider y so team podü saludé incër 60 porsones. Tröpes de chëstes â ince tut pert al quiz organisé da d’altonn, por chël che al é atira dal mëteman gnü fat la premiaziun. Sön i 86 partezipanc n’él sté 10 che á respognü döt dërt.
Canche i pesć é stá surandá, éson passá al nojel dl domisdé y chiló s’á le Consëi de formaziun studié fora val’ de particolar: na degustaziun n pü’ atramënter, na cercia de eghes – val’ che tröc ne n’â gnanca mai cis aldí. Por la desfiré indortöra, él gnü invié adalerch le sommelier dles eghes André Hofer.

T’La Usc di Ladins di 29 de merz podëise lí che che á respognü dërt al quiz, ci sort de eghes che al é gnü ciarcé y ince de vigni sort d’atres coriosités.  (pablo)