La Usc di Ladins

La festa de Santa Maria dal Ciüf é por le paisc da La Ila vign’ann danü ince le de che al vëgn mostré domisdé na gran defilada. Insciö éra ince stada iniann. Sot la coordinaziun y organisaziun de Jessica Flöss, él en chësc iade gnü presenté ”L'isté tl’Alta Badia”. Bëgn 180 porsones á fat para ativamënter por avelí y rapresenté cun guanc mo ince ciars alegorics dötes les ativités da d’isté. Dai fonguns de bosch ai arpizadus da n tëmp, dal pröm implant portamunt ai sciori n pü’ scich, cina ai tëmps d’aldedaincö. N ciar i é ince gnü dediché ala Maratona dles Dolomites, che á complí iniann sü pröms 30 agn. La defilada é stada na maestria organisativa, olache i partezipanc á ciaré ai details, á porté ite originalité y ince na buna porziun de simpatia. Mancé n’á gnanca le tradizional, cun les musighes che á soné, i platleri y les trohtes de nüsc posć. Döt chësc é gnü premié cun la gran partezipaziun de ghesć y jënt dl post, che á insciö podü se gode n bel domisdé te paisc. I ves pitun chiló na ligna de retrac, che nes é gnüs metüs a desposiziun da Freddy Planinschek.

Deplü ciafëise t’La Usc di Ladins di 19 d’agost.  (pablo)